Чәршәмбе, 08 Ноябрь 2017 10:32

Марсель Сәлимҗанов премиясе Ризван Хәмидкә тәгаенләнде. Вафатыннан соң...

Rate this item
(0 votes)

 

7 ноябрьдә Г.Камал театрында  Марсель Сәлимҗанов исемендәге Республика премияләрен тапшыру тантанасы булды.

Премия Татарстан Республикасы Президенты Указы белән булдырылды һәм Татарстан Республикасының профессиональ театр сәнгате үсешенә зур өлеш керткән иҗат коллективларына, мәдәният хезмәткәрләренә 2 елга бер мәртәбә бирелә. Премия нигезләмәсе буенча, өч җиңүченең һәрберсенә 200000 сум күләмендәге акчалата бүләк, һәр премиягә өстәп махсус бүләк һәм Мактау дипломы тапшырыла.

 2017 елда  Татарстан Язучылар берлеге әлеге дәрәҗәле премиягә  танылган драматург Ризван Хәмидне тәкъдим иткән иде. Драматургның «Синең урыныңа кайттым...» исемле беренче пьесасын Марсель Сәлимҗанов сәхнәләштерә. Соңрак Ризван Хәмид әсәрләре күп театрларда зур уңыш белән озак еллар уйнала. Драматургның Гаяз Исхакыйның «Курчак туе» әсәренә нигезләнеп, Мансур Гыйләҗев белән автордашлыкта язган инсценировкасы буенча Камал театры куйган спектакль җәмәгатьчелектә зур кызыксыну, каршылыклы фикерләр тудырган, тәнкыйтьчеләрнең югары бәясен алган әсәр булып театр тарихына кереп калды.

2017 елның  сентябрендә Ризван Хәмид вафат булды. Премия комиссиясе тарафыннан  күренекле драматургка тәгаенләнгән бүләкне хатыны Гайшә ханым алды. «Бүген Ризванның вафатына 50 көн булды, – диде ул. – Марсель Сәлимҗанов Ризванга бик ярдәм итте. Ул аның беренче әсәрен куйды. Ул күреп алмаса, белмим, аның тормышы ничек булыр иде икән?! Ризван театр дип, әдәбият дип яшәде».

Конкурс комиссиясен Татарстанның күренекле мәдәният эшлеклеләре тәшкил итә Комиссиянең рәисе – Татарстан Республикасының мәдәният министры Айрат Сибагатуллин.

 

 

2015 елда М.Сәлимҗанов исемендәге премия лауреаты исеменә Россиянең һәм Татарстанның халык артисты Ринат Таҗетдинов, Татарстанның атказанган мәдәният хезмәткәре Гомәр Мәрдәнов, Туфан Миңнуллин исемендәге Түбән Кама  Татар дәүләт драма театрының баш режиссеры Рөстәм Галиев лаек булган иде.

2017 ел лауреатлары – Казан Рус яшь тамашачы театры коллективы, Сабир Өметбаев исемендәге Минзәлә Татар дәүләт драма театры директоры Роберт Шәймәрданов, танылган драматург Ризван Хәмид (вафатыннан соң).

 

Фото "Татар-информ» сайтыннан алынды.

Read 117 times
Союз писателей РТ