Дүшәмбе, 28 Май 2018 16:40

Разил Вәлиев Германиядә татар әдәбияты антологиясен немец телендә чыгарырга тәкъдим итте

Rate this item
(0 votes)

Бүген Дәүләт Советында Мәгариф, мәдәният, фән һәм милли мәсьәләләр комитеты рәисе Разил Вәлиев танылган немец тәрҗемәчесе Роземари Титце белән очрашуда Германиядә татар әдәбияты антологиясен немец телендә бастырып чыгару мөмкинлеген карарга тәкъдим итте. Бу турыда Татарстан Дәүләт Советы матбугат хезмәте хәбәр итә.

Сөйләшү барышында Разил Вәлиев Германиядән килгән кунакка Татарстан парламенты һәм комитет эшчәнлеге турында сөйләде. Аерым алганда ул Татарстанда туган телләрне һәм республиканың дәүләт теле буларак татар телен мәктәпләрдә укыту белән бәйле вазгыятькә тукталды. «Мәктәп программаларында әлеге мөһим дәресләрне ирекле калдыруга без катгый рәвештә каршы чыктык, – диде ул. – Хәзерге вакытта федераль парламент белән якларны килештерү эшләре дәвам итә. Күп регионнар, бигерәк тә милли республикалар безнең позицияне яклыйлар. Чөнки алар телне мәҗбүри укытмаган очракта мәдәният тә, гореф-гадәтләр дә, ахыр чиктә милләт үзе дә юкка чыгасын аңлыйлар».

Татарстан парламентарие немец язучысына мәдәни хезмәттәшлек һәм мәгърифәт программалары белән алмашу кысаларында Германиядә татар әдәбияты антологиясен немец телендә бастырып чыгару мөмкинлеген карарга тәкъдим итте.

Әңгәмәдә шулай ук Татар ПЕН-үзәге җитәкчесе, язучы Әхәт Мушинский катнашты.

Роземари Титце үзенең Татарстан башкаласына Лев Толстой тормышын өйрәнү максатында килүен әйтте. Ул шулай ук Татарстанда милли мәгариф эчтәлеге белән кызыксынды һәм чираттагы китап чыгару планнарын сөйләде.  

(«Татар-информ», Рамил Гали фотосы)

Read 447 times
Союз писателей РТ