Апас район үзәк китапханәсендә шагыйрә, язучы Гөлнур  Айзетуллова иҗатына багышлап «Хисле күңел» дигән очрашу уздырдылар. Өч сәгатькә сузылган кичә шагыйрәнең  чыгышы, аның сүзләренә иҗат ителгән җырлар, әсәрләренең прототиплары фикерләре, район җитәкчелеге,туганнары,сыйныфташлары котлаулары   белән аралашып барды.

Шагыйрә, шулай ук, Сембер каласының Заволжье район администрациясе бинасында  «Яшәү яме» дип аталган очрашуда  катнашты. Әдәби-музыкаль кичә татар автономиясенең район советы hәм җирле «Ак калфак» оешмасы тырышлыгы нәтиҗәсендә яңа форматта hәм бай эчтәлекле итеп әзерләнгән иде

 

Җомга, 12 Апрель 2019 10:40

Яшь укучылар белән очрашулар

Казан шәһәренең 37 нче гимназиясендә балалар язучылары Лилия һәм Резеда Фәрхетдиновалар белән очрашу узды. Гимназиянең 1нче "в" сыйныфы укучылары язучы апаларының шигырьләрен һәм шигъри әкиятләрен сәнгатьле итеп яттан укыдылар. 8 нче сыйныф укучысы Лилия апаларының әкиятен сөйләде. Балалар бу чарага бик яхшы әзерләнгәннәр, язучы апаларының иҗатлары белән алдан ук ныклап танышканнар.Ахырдан нәни китап укучылар язучы апаларына бик күп сораулар бирделәр.
Лилия һәм Резеда Фәрхетдиновалар, шулай ук, 160 нчы балалар бакчасында да очрашуда булдылар

 

 

Язның беренче көне сәнгать мәктәбе укучыларның күңелләрендә аеруча истәлекле булып уелып калды. Алар “Уртадан аткан чәчәк” дип аталган әдәби-музыкаль кичәдә 39 нчы балалар бакчасы өлкән тәрбиячесе, тугыз китап авторы Нурзия Рашит кызы белән очраштылар, иҗаты белән таныштылар.

Нурзия Мирхазованы шәһәребез мәктәпләре укучылары “Сүздән энҗеләр тезеп...” проекты буенча танып хөрмәт итсәләр, безнең өчен ул – күркәм холыклы, үрнәк хатын-кыз, атказанган мөгаллимә, тәрбияче, “Кама таңнары” һәм “Ак калфак” оешмаларының актив әгъзасы, Татарстан Язучылар берлеге әгъзасы, үз эшенең чын остасы, туган телебезгә мәдхия җырлаучы. Күркәм нәтиҗәләргә китерүчән төгәллек тә, хатын-кыз пөхтәлеге дә бар анда.

Каләмдәше Рифкать Имаевның “Нурзиягә” дип атап язган шигъри юллары да минем әйткән сүзләремә тәңгәл килә.

Ачык йөзле, тәмле сүзле

Син шундый бит тумыштан.

Картаймый ул яшәгәннәр

Ямь алып бу тормыштан.

Телисең икән – мактан,

Синең күңелең актан.

Һәммәбезгә чын үрнәк син

Бары тик яхшы яктан.

Ә иҗаты – балачакта сайлаган һөнәренең кушымтасы. Ягъни, әдәби иҗаты тәрбияви әсәрләрдән торуы белән кыйммәт. Бары тик һөнәренә тугры кеше вазыйфасын җиренә җиткереп башкара һәм аны тагын да баетуга, камилләштерүгә юнәлеш таба. Бу очракта аның тәрбияви әсәрләре дә ярдәмгә килә, шулай ук шәхси проектлар булдыруы да мактаулы хезмәтенең бизәге булып тора. Алар берсен-берсе тулыландырып, үрелеп алып барыла.

Әйтик, балалар бакчасында тәрбияләнүчеләр, башлангыч сыйныф укучылары ике дәүләт телендә нәшер ителгән “Серле рәссам” (Волшебный художник), “Бүләк” китабын яратып укысалар, өлкәнрәкләр өчен “Уяну” дип исемләнгәне өстәл китабы булырлык. Шуңа да укучылар фәнни-гамәли конференцияләрдә Нурзия Мирхазованың иҗаты буенча республика күләмендә чыгышлар ясыйлар, шигырьләренең генә түгел, әсәрләренең дә тәрбияви әһәмиятен, иҗади үзенчәлекләрен дәлилләп сөйлиләр. Димәк, балалар бакчасында тәрбияләнүче сабыйларга гына түгел, мәктәп укучыларына да, көллият студентларына да әйтер сүзе, бирер киңәше бар Нурзия Рашит кызының.

 Очрашу вакытында янә шул фикергә килдек. Балалар өйрәнгән шигырьләрен сәнгатьле итеп тамашачыларга җиткерделәр, чараны алып баручылар сәнгать мәктәбенең алдынгы хезмәткәрләре Чулпан Загреева белән Гөлнара Хафизова, Нурзия Мирхазованың кечкенә чагыннан алып, бүгенге көнгә кадәр булган үсешләре турында тәфсилләп сөйләделәр, яңалыклары белән таныштырдылар, экранда дәлилләүче фотосурәтләр дә яктыртылды. Төрле мавыктыргыч сораулар аша Нурзия апаларының ничек, кайчан иҗатка тартылуын да, әдәбиятның кайсы өлкәсендә күбрәк каләм тибрәтүен дә, каян вакыт табуын да ачыкладылар.

Сәнгать мәктәбендә белем алучылар арасында иҗат белән шөгыльләнүчеләр аеруча күп, шуңа да бәйрәм төсмерен алган кичәдә осталыкларын күрсәтеп, төрле уен коралларында уйнадылар, җырладылар. Кичә тәмамлангач та хушлашырга ашыкмадылар, язучы апалары белән селфи төшеп, телефон номерын алырга да өлгерделәр. Гармун моңына кушылган җыр дулкыны тәнгә генә түгел җанга да дәва, диләр бит. Укучы балалар каршында остазлар Кәүсәр ага Камалиев белән Гөлфия ханым Шиһапова чыгышы да бик урынлы иде, чагыштырып карарга җирлек тудырылды.

Нурзия апалары да, гадәттәгечә шигырь сөйләүчеләргә генә түгел, иң шәп сорау бирүчеләргә дә китапларын бүләк итте. Яшь буынга тәрбия бирүгә багышлаган хезмәтен һәм иҗатын зурлап, үзебез дә чыгыш ясадык. Рифкать Имаев югарыда телгә алынган шигырен укыса, озак еллар “Кама таңнары” әдәби берләшмәсен җитәкләгән атказанган мәдәният хезмәткәре Фәтхулла Абдуллин, балаларга мөрәҗәгать итеп:

– Нурзия сеңлебез гадәти гаиләдә туган, гади авыл баласы, үз тырышлыгы белән югары дәрәҗәләргә ирешкән, сезгә дә аның кебек булырга омтылырга кирәк. Бары тик тырыш хезмәт кенә кешене бәхетле итә, тарихка тирән эз сала, - диде.

Бик дөрес сүзләр! Яхшы холык кечкенә чагыннан ук формалаша, гомер буе дәвам итә, шуңа да “күркәм холык – гомер чәчәге” дип әйтәбез андыйлар хакында. Нурзия Рашит кызының күргәзмәдә урын алган китаплары, методик әсбаплары, журнал битләрендә дөнья күргән дәрес эшкәртмәләре, мәкаләләре дә нәкъ шул хакта сөйли. Әдәби иҗаты да тәрбияви әсәрләрдән гыйбәрәт булуы белән аерылып тора.

Сәнгать мәктәбе директор урынбасары Людмила Харитонова да мавыктыргыч, тәрбияви очрашу өчен чиксез зур рәхмәтен белдереп, Нурзия Мирхазовага истәлекле бүләк тапшырды, иҗади уңышлар теләде.

 

Суфиян Минһаҗев

Мәгариф ветераны,

Аксакаллар шурасы әгъзасы

 

 

 

 

Пәнҗешәмбе, 28 Февраль 2019 15:34

“Очкын булып оча шигырьләрем “

      

   Буа шәһәренең 1 нче урта мәктәп коллективы  язучылар белән иҗади дуслыкка  зур игътибар бирә. Мәктәпнең татар теле укытучылары быелгы  сәнгатьле уку бәйгесен  әдәби кичә кысаларында   шәһәрнең  үзәкләштерелгән китапханәсендә үткәрергә уйлаганнар.
“Очкын булып оча шигырьләрем “дип аталган әдәби кичәгә кунак итеп мөгаллимә-шагыйрә Гөлнур Айзетуллованы (Айзат)чакырганнар.Мәктәпнең 7-10 нчы сыйныф укучылары Гөлнур  Айзатның шигырьләрен укуда,җырларын башкаруда ярышканнар.Шагыйрә сүзләренә иҗат ителгән җырларның клиплары да кичәдә катнашучыларга  бик ошаган.Алар язучы,шагыйрә апаларына дистәләгән сораулар яудырып,иҗаты,тормышы турында кызыксынганнар.Гөлнур Айзатның иҗатын яратучы укытучылар,хаҗиларның да чарада катнашуы,шагыйрәгә бик сөенечле минутлар китергән,үз чиратында автор мәктәп коллективына  һәм үзәк китапханәгә “Бәхет кошы”исемле яңа китабын бүләк иткән.

 

Җомга, 22 Февраль 2019 14:47

Кырлайда ТУГАН ТЕЛ КӨНЕ

21 февраль - Туган тел көне уңаеннан, Г.Тукай исемендәге Яңа Кырлай урта мәктәбенә кунакка тәрҗемәче, язучы Гәүһәр Хәсәнова (Мәһдиева) һәм шагыйрә, журналист Эльмира Сираҗи кайтты. Укучылар кунакларга зур әдәби-музыкаль программа күрсәттеләр. Кунаклар укучыларга туган телне тирәнтен белергә кирәклеген төшендерделәр, балаларның сорауларына җавап бирделәр. 

Җомга, 22 Февраль 2019 14:05

Кәче авылына язучылар килде!

Туган теле барның – милли юлы бар, милли йөзе бар, шәхес буларак үзе бар, кеше буларак абруе бар, кадер-бәясе , хөрмәте бар. Газиз туган телебез-татар телен кадерлик, яклыйк, саклыйк!

    21 нче февраль көнне Арча районының Кәче төп гомуми белем мәктәбендә «Туган тел» көненә багышланган язучылар һәм сәнгать әһелләре  белән бик матур очрашу кичәсе узды. Кичәдә  мәркәзебездән килгән хөрмәтле кунакларыбыз: татар поэзиясендә үз урын алган шагыйрь,  Татарстан Язучылар берлеге әгъзасы, күпсанлы китаплар авторы,  якташыбыз  Арча районы Шура   авылында туып-үскән  Галиәхмәт   ага  Шаһи һәм Татарстанның атказанган артисты,  яраткан җырчыбыз, доцент Люция Хәсәновалар катнашты.

  Кунаклар  үз  чыгышларында туган телне сакларга өндәделәр, аның никадәр дәрәҗәдә кыйммәтле булуын ассызыкладылар.  Кичә  укучыларның  туган тел турындагы  шигырьләре, җыр һәм биюләре  белән үрелеп барды. Бу очрашу һәркем күңелендә якты, матур истәлек булып сакланыр.(Энҗе Әхмәтҗянова. Кәче авылы)

 

 

Шимбә, 29 Декабрь 2018 13:56

Зәйдә истәлекле очрашу

2018 елның соңгы көннәрендә Зәй шәһәренең һәм районының Үзәк китапханә бинасы, капиталь ремонттан соң, тантаналы рәвештә укучыларга янә үз ишекләрен ачты. Шушы уңай белән матур итеп оештырылган бу чарада якташлары Рабит Батулла, Хатыйп Миңнегулов, Наил Дунаев, Фаяз Хуҗин, Геннадий Максимов, район хакимият башлыгы Рәзиф Кәримов, Республика Милли китапханәсенең директор урынбасары Ирек Һадиев та катнашты һәм чыгыш ясады.

Источник информации: Х. Йосыпов.

Шимбә, 29 Декабрь 2018 13:32

«...Дөнья тюркологиясе тарихы»

 

 2018 елның 24 декабрендә Астана шәһәрендәге Казахстан Республикасының Милли Академик китапахнәсендә тюркологиябезнең мөһим мәсьәләләренә багышланган Халыкара фәнни-гамәли конференция үткәрелде. Аның эшендә төрки дөньяның күренекле галимнәре, Казахстанның әдәбият, мәдәният әһелләре, шулай ук хакимият вәкилләре (берничә министры) катнашты. Бу гыйльми мәҗлес кысаларында күптән түгел Алматы каласында урыс, казах һәм инглиз телләрендә өч китап рәвешендә нәшер ителгән “Тюркология: История всемирной тюркологии” хезмәтен дә тәкъдим итү (презентация) булды. Россия, Казахстан, Кытай, Үзбәкстан, Төркия һәм кайбер башка илләрнең галимнәре тарафыннан язылган бу монографиядә  дөнья тюркология  фәненең тууы, үсеше һәм хәзерге торышы яктыртыла. Аның “Казан тюркологик мәктәбе” дип исемләнгән бер бүлегенең авторы — профессор Хатыйп Миңнегулов. Казан галиме конференциянең пленар утырышында доклад та сөйләде. Аның “Предистория формирования казанско-татарской тюркологической школы” темасын яктырткан чыгышы бу гыйльми мәҗлеснең махсус җыентыгында да басылып чыккан.

Х. Йосыпов.

 

Сишәмбе, 25 Декабрь 2018 16:37

«Волга» шифаханәсендә әдәби очрашу

21 декабрь кичендә «Волга» санаторий-профилакториендә бер төркем язучыларның милләттәшләр белән очрашуы узды. Шигъри аһәңле бу кичәдә Татарстан язучылар берлеге әгъзалары Әнвәр Шәрипов, шагыйрә Фәүзия Солтан, Рәдиф Сәгъди, Хәбир Ибраһим, Рахман Шәфигуллин катнашты. 

Сишәмбе, 25 Декабрь 2018 13:52

Шифаханәдә шигъри очрашу

Чаллы шәһәрендәге «Энҗе бөртеге» («Жемчужина») шифаханәсендә  шагыйрә Фәүзия Солтанның  «Көзге шәфәкъ» дип аталган шигърият кичәсе булды. Кичәгә килгән тамашачылар   шигырьләр тыңладылар, шагыйрә белән аралаштылар.

Страница 1 из 6
Союз писателей РТ