Админ

Алты томга сузылган сайланма әсәрләр тупланмасын Татарстанның Тукай исемендәге бүләк иясе Вахит Имамовның иҗат җимешләре тәшкил итә. Татарстан китап нәшриятында дөньяга чыгарылган 1нче һәм 2нче томнар сату киштәләрендә урын алды инде.

Беренче том Татарстанның халык язучысы Марсель Галиевнең «Ул язар өчен яши» дип аталган кереш мәкаләсе белән ачыла. Тәүге томга әдипнең «Тозлы яра» исемле роман-дилогиясе, «Япон татары» дип исемләнгән тарихи бәяне һәм «Ир канаты» исеме белән яңгыраган тәүге повесте тупланган.

Икенче томга кертелгән «Казан дастаны» татар халкының 1000 ел элеккеге тарихын һәм Казан каласы нигезләнү вакыйгаларын бәян итсә, «Каенсар» романын әдип үзенең туган төбәгенә һәм газиз нәселе кичергән аяныч хатирәләргә багышлаган. Чаллы төбәге халкын Чулман елгасыннан кергән фенол белән агулау, Татарстан Рес­публикасының мөстәкыйльлеге өчен кузгалган көрәш вакыйгаларын ачыктан-ачык сурәтләү белән моннан утыз ел элек үк яңгыраган «Кәнәфи» повесте дә шушы томда урын алган. Әлеге том да каләмдәш һәм замандашларының В.Имамов иҗатына биргән бәя тупланмалары белән тәмамлана.

Сайланма әсәрләрнең яңа томнары Татарстан китап нәшриятында тагын дөньяга чыгаруга әзерләнә.

2011 елдан Актаныш районы үзенең якташы, күренекле шагыйрь Гамил Афзал исемендәге әдәбия премия булдырган иде. Аңа ел саен юмор һәм сатира өлкәсендә иң үткен, яхшы дип табылган матур әдәбият әсәре авторы ия була.  Аның беренче иясе итеп Туфан ага Миңнуллин аталды. Төрле елларда бу бүләккә Фәнзаман Баттал, Марат Әмирханов, Әмирҗан Моталлапов, Камил Кәримов, Ләбиб Лерон, Данил Салиховлар  ия булды.


Быел исә әлеге премиянең тапшырылу тантанасы Гамил Афзал үзе туып-үскән Такталачык авылында оештырылу белән тарих битләрендә үз урынын алачак. Сигезенче премия иясенең исеме бүген Такталачыкның җәмәгать үзәгендә аталды.  Мәртәбәле бүләккә язучы, журналист Дамир Гыйсметдин (Дамир Минсәгыйр улы Гыйсметдинов) лаек булды. Дамир Минсәгыйр улы әлеге премияне  Актаныш районы башкарма комитеты җитәкчесенең социаль мәсьәләләр буенча урынбасары Ләйсән Нурлыева  һәм Татарстан Язучылар берлеге рәисе Данил Салихов кулыннан кабул итеп алды. 


Бәйрәм чарасында дәрәҗәле Казан кунаклары, шагыйрьләр, язучылар катнашты. Такталачык төп гомуми белем бирү мәктәбе укучылары да әлеге тантананың кунаклары иде. 

 

(Фоторепортаж бу сылтама буенча: http://aktanysh-rt.ru/news/tema-dnya/kon-kadagynda-aktanyshta-gamil-afzal-premiyasene-sigezenche-iyase-ataldy-fotomizgellr . Язма Актаныш муниципаль районы сайтыннан алынды)

 

 

Язучы, журналист Дамир Гыйсметдин (Дамир Минсәгыйр улы Гыйсметдинов) 1949 елның 25 гыйнварында Чуашстан Республикасының Батыр районы Татар Тимәше авылында укытучы гаиләсендә туа. 1966 елда шул ук районның Тойси урта мәктәбен тәмамлаганнан соң, бер ел туган авылында, аннары Мәскәү тирәсендәге төрле төзелешләрдә эшли, 1969-1970 елларда армиядә хезмәт итә. Армиядән соң Казанга килеп, 1971-1976 елларда университетның журналистика факультетында югары белем ала. Университетны тәмамлагач, ун елдан артык (1975-1986) «Чаян» журналы редакциясендә хәбәрче, бүлек мөхәррире, бүлек мөдире булып эшли. Шул дәвердә ул үзенең сатирик каләмен чарлый, «Чаян» журналы һәм башка көндәлек матбугат битләрендә юмор-сатира жанрындагы күп кенә хикәяләрен, усал эчтәлекле фельетоннарын бастырып, укучыларның киң даирәсенә исемен таныта. Узган гасырның сиксәненче елларында аның кайбер юмор-сатира әсәрләре Мәскәү басмаларына да урнаштырыла.
1986—1990 елларда Д.Гыйсметдин КПССның Татарстан өлкә комитетында халыкара мәсьәләләр буенча консультант һәм бүлек инструкторы булып эшли. Туксанынчы елларда халыкара «Ватан» җәмгыятенең әүвәл рәис урынбасары, аннары рәисе вазифаларын башкара, Бөтендөнья Татар Конгрессының идарә әгъзасы буларак, чит илләрдәге татар диаспорасы белән багланышларны ныгыту юнәлешендәге эшләргә җитәкчелек итә. Туксанынчы елларның урталарыннан башлап Дамир Гыйсметдин Татарстан Республикасының чит ил компанияләре белән уртак предприятиеләре идарәләрендә җаваплы җитәкче урыннарда эшли. Дамир Гыйсметдин — юмор-сатира әсәрләре тупланган өч китап авторы («Өметсез шайтан», 1990; «Әйтсәм әйтим», 1999; «Атта да, тәрттәдә дә...», 2007). Ул шулай ук аерым күмәк җыентыклардагы («Таныш булыгыз, Ломжа» — «Знакомтесь, Ломжа», 1989; «Йөртә безне язмышлар», 1992) очерк язмалары, музыкага салынган популяр җыр текстлары (унлап җыры 1999-2000 елларда чыккан «Сез яраткан җырлар» китабына кертелә) һәм төрекчәдән тәрҗемә китаплары авторы буларак та укучыларга таныш. Аерым алганда, Ф.Бичури белән берлектә ул Төркиядә үз вакытында киң танылган милләтпәрвәр татар эшкуары-кәсепчесе Ибраһим Мәңгәр турында кызы язган истәлек китабын (Сафия Имре. «Әтием», Казан, 1994) төрекчәдән татарчага тәрҗемә итә. Ул — Татарстанның атказанган мәдәният хезмәткәре. Д.Гыйсметдин — 2002 елдан Татарстан Язучылар берлеге әгъзасы.

 

Сишәмбе, 18 Декабрь 2018 10:30

Татар-кыргыз улын Кытай да зурлый

 

 Кыргыз һәм татарның уртак улы Чыңгыз Айтматовның 90 еллыгы элеккеге СССР кысаларында гына түгел, күп кенә чит илләрдә, шул исәптән Кытайда да зурлап үткәрелде. Мәгълүм ки, бу мәмләкәттә бу бөек язучы иң танылган, иң мәшһүр әдипләрдән  хисаплана. Аның әсәрләре кытай телендә күп мәртәбәләр миллионлаган тираж белән басылып тора, алар нигезендә кинофильмнар төшерелә, спектакльләр куела. Кытай халкы Ч. Айтматов әсәрләрендә үзен борчыган күп кенә сорауларга җаваплар таба.

Шушы елның декабрь урталарында Пекинда бөек әдипнең 90 еллыгы уңае белән күп төрле чаралар (конференция, китап һәм фото-күргәзмәләр, кинофильмнар карау, яңа басмаларны тәкъдим итү һ. б.) үткәрелде, социаль челтәрләрдә бай һәм кызыклы мәгълүматлар чагылыш тапты.  Болар арасында аеруча, “Дөнья мәдәни контекстында Ч. Айтматов” темасына Пекин университетында уздырылган Халыкара конференция мөһим һәм үзәк урынны алып торды. Кытайның һәм чит илләрнең күп кенә гыйлем, мәгариф, мәдәният әһелләре катнашкан бу чараның пленар утырышында Казан федераль университеты профессоры Хатыйп Миңнегулов (Россия Федерациясенең бердәнбер вәкиле сыйфатында) чыгыш ясады. Ул урыс, кытай һәм инглиз телләрендә яңгыраган үз докладында татар һәм Кытай арасындагы күп гасырлык тарихи мөнәсәбәтләргә, Ч. Айтматов иҗатының аерым үзенчәлекләренә, бөек әдипнең халкыбыз белән багланышларына, аның татар рухи тормышындагы роленә тукталды. Казан профессорының чыгышы  конференциядә катнашучыларда зур кызыксыну тудырды.

Ч. Айтматовның юбилее уңае белән Кыргызстан Республикасының Кытайдагы илчелеге Пекинның иң затлы кунак йортларының берсендә рәсми кабул итү мәҗлесе үткәрде. Анда Кытайның хөкүмәт вәкилләре, галим-мәдәният әһелләре, шулай ук чит ил кунаклары, дипломатлар катнашты. Алар арасында Кыргызстанның экс-президенты  Роза ханым Отунбаева, шулай ук әдипнең сеңлесе Роза ханым һәм улы Илдар да бар иде.

Ч. Айтматовның бай иҗаты, күпкырлы эшчәнлеге, планетар фикерләве кешеләрне, ил һәм халыкларны якынайта, җәмгыятьнең инсани үсешенә көчле йогынты ясый. Бөек  әдип әсәрләре кешелекнең даими юлдашы, фикердәше булып тора. Юбилей чаралары  әнә шул хакыйкатьне янә бер мәртәбә раслады.

 

         Х. Йосыпов

          

 

Бүген Уфада  Башкорт дәүләт опера һәм балет театрында  «Йөрәк сүзе» шигъри проектының финалы уза.  Әлеге проектта башкорт телендә шигырь укучы дуэтлар катнаша, танылган шагыйрьләр һәм актерлар, музыкантлар һәм журналистлар, поэзия яратучылар шигъри осталыкта көч сынаша.

«Бу минем өчен йөрәк авазы проекты. Безнең республикада, башка күпмилләтле төбәкләрдә телне саклау һәм үстерүгә кагылышлы үзәккә тигән социаль проблемага җавап бу. Безнең проект – үзенә күрә халык мөнбәре ул. Анда катнашучылар җәмгыятьне борчый торган проблемалар турында йөрәктән чыккан сүзләр белән йөрәккә барып җитәрлек итеп сөйләшә», – ди проект җитәкчесе Наилә Сәфәргулова. Оештыручылар җиңүчегә автомобиль бүләк ителәчәге хакында да хәбәр итәләр.

Башкорт кардәшләрнең шигырь бәйрәмендә кунак булып  Татарстан язучылары һәм шагыйрьләре – Фәйрүзә Мөслимова, Эльмира Шәрифуллина, Факил Сафин, Рәмис Аймәт, Йолдыз Шәрапова, Айгөл Әхмәтгалиева, Әлфия Ситдыйкова, Гөлнур Корбанова, Рифат Җамал, Роберт Сәләхиев катнаша.

 

«Кунакчыл Түбән Кама» проекты кысаларында 14 декабрь көнне шәһәрнең Габдулла Тукай исемендәге үзәк китапханәсендә Татарстанның халык шагыйре, атказанган сәнгать эшлеклесе, Башкортстанның  атказанган мәдәният хезмәткәре, җәмәгать эшлеклесе  Роберт Миңнуллин белән очрашу узды. «Күңеле тулы моң булгач...» дип аталган кичәгә кунак булып,  ТР Язучылар берлеге рәисе, драматург Данил Салихов һәм Татарстанның халык язучысы,  шагыйрь Гәрәй Рәхим дә килгән иде.

Әдипнең 70 еллыгына багышланган кичәгә район башкарма комитеты, иҗтимагый оешмалар вәкилләре, укытучылар, китапханәчеләр, журналистлар, мәктәп укучылары, шагыйрь иҗатын яратучы әдәбият сөючеләр җыелды.

Программа барышында Роберт Миңнуллинның тормыш һәм иҗат сәхифәләре  күздән кичерелде, очрашу шагыйрьнең үз хатирәләре белән үрелеп барды, автор әдәбият сөючеләр каршында шигырьләрен укыды.  

«Түбән Кама миңа бик кадерле. Монда минем милләттәшләрем, якташларым яши; яшь чакларда ешрак килә идек, бик матур кичәләр уза иде», – дип билгеләп үтте Роберт ага һәм аерым бер җылылык белән биредә моннан кырык еллап элек оешып киткән «Җидегән чишмә» әдәби -музыкаль берләшмәсе, анда узган  иҗат кичәләрендә үзенең дә катнашуы турында истәлекләре белән уртаклашты.

Күренекле шагыйрьне  гомер бәйрәме белән  түбәнкамалылар исеменнән Бөтендөнья  татар конгрессының җирле бүлеге җитәкчесе Рөстәм Ганиев тәбрикләде. «Сезнең белән очрашу безнең өчен зур шатлык, күрәсезме, зал тулы халык, Түбән Кама Сезгә сусаган», – дип мөрәҗәгать итте ул һәм Роберт агага әдәбиятыбызны, мәдәниятебезне саклап калуда,  үстерүдә лаеклы өлеш кертүе өчен зур рәхмәтләрен җиткерде, уңышлар теләде.

Сәхнә түреннән «Сагынам, дуслар» җырын сузып, барлык түбәнкамалыларны таң калдырган, милләтпәрвәр шәхес, ТР Язучылар берлеге рәисе Данил Салихов; әдипнең балалар әдәбияты өлкәсендә нәтиҗәле эшләвен аерым билгеләп үткән  Гәрәй Рәхим чыгышларын тамашачы алкышларга күмде. Үзләренең тәбрикләү һәм рәхмәт сүзләрен район мәдәният идарәсе җитәкчесе Гүзәл Мөбарәкшина, үзәкләштерелгән китапханәләр системасы директоры Гөлназ Арсланова,  «Кама таңнары» әдәби берләшмәсе әгъзалары, Аксакаллар шурасы, китапханәчеләр, журналистлар, дини оешма вәкилләре җиткерде.

«Кунакчыл Түбән Кама» проекты әле тәүге адымнарын ясый, – дип билгеләп үтте проект авторы Гөлназ Арсланова. – Аның беренче сәхифәсендә без нәкъ менә Сезне күрергә теләгән идек, хыялыбыз тормышка ашуына чиксез шатбыз”.

49нчы бакча балаларының әдип шигырьләрен сәнгатьле итеп укулары, 70кә якын китап язудан  тыш,  300ләп җыр авторы булган Роберт Миңнуллин сүзләренә җирле җырчылар – Илһам Хисмәтуллин, Разыя Якупова   башкарган җырлар, Флүр Гайнемөхәммәтовның гармун моңнары кичәне тагын да җылырак, тәэсирлерәк итте.

Китапханә залында  Роберт Миңнуллин иҗатына багышланган күргәзмә дә эшләде. Очрашу  бергәләп фотога төшү, автографлар алу, шәхси әңгәмәләр белән дәвам итте.

Гөләндәм Галиева, район хакимияте рәсми сайты мөхәррире

 

 

Кичә Сембер шәһәренең Губернатор сараенда «Гакыйль Сәгыйров укулары» узды. Татарстан Язучылар берлеге әлеге масштаблы чараны оештыручыларның берсе. «Гакыйль Сәгыйров укулары»нда сәламләү сүзе белән ТР Язучылар берлеге рәисе, драматург Данил Салихов чыгыш ясады. Көрәшче рухлы язучы истәлегенә узган әлеге очрашуда күренекле шәхесләр, мәшһүр сәнгать осталары катнашты.

15 декабрьдә Түбән Кама шәһәренең «Мирас» мәдәният сараенда «Кама таңнары» әдәби берләшмәсе оешуга 50 ел тулуга багышланган әдәби-музыкаль кичә үткәрелде. 3 сәгатькә якын дәвам иткән әдеге кичәдә танылган язучылар, сәнгать коллективлары, әдәби берләшмәнең элеккеге һәм бүгенге әгъзалары чыгыш ясады. Данлы әдәби берләшмәне олуг юбилее белән Казаннан Татарстан язучылар берлеге рәисе урынбасары Рәмис Аймәт, танылган әдәбият галиме Фоат Галимуллин һәм шушы берләшмәдән үсеп чыккан шагыйрә Илзирә Вәлиуллина котлады.
Татарстан Язучылар берлегенең Чаллы бүлекчәсе рәисе, танылган язучы Факил Сафин, «Кама таңнары»ның нигез ташларын салган күренекле шагыйрь, прозаик, публицист Айдар Хәлим һәм «Мәйдан» журналының баш мөхәррире Фидаил Мәҗитовның гамьле чыгышлары уйландырды да, моңландырды да...

«Кама таңнары» әдәби берләшмәсе тарихы хакында кайбер белешмә:
«Кама таңнары» әдәби берләшмәсе оешуга да 50 ел ...Шушы гомер эчендә ниләр булган, оешу чорында кемнәр чишмә башында торган әдәби берләшмә нинди үрләр яулаган? Кыскача гына булса да хатирәләргә бирелеп алыйк әле.
...1965 елда Түбән Камага шәһәр статусы бирелә һәм рус телендә «Ленинская правда», татар телендә аның дубляжы – «Ленин нурлары» газеталары нәшер ителә башлый. Шул ук елны «Ленин нурлары» газетасы редакциясе каршында әдәби түгәрәк оеша. Аның җитәкчесе итеп һөнәре буенча укытучы, үзе дә шигъри җанлы Камил Гыйльмуллин билгеләнә. Ә инде икесе дә бунтарь йөрәкле Рахмай Хисмәтуллин белән Айдар Хәлим килгәч, әдәби мохит түгәрәк кысаларына гына сыймый башлый. Чөнки каләм тибрәтүчеләр һәм әдәбият сөючеләр саны бермә-бер арта.
Берләшмә әгъзалары шигырь язу белән генә чикләнми, хезмәттәшләре турында мәкалә-очерклар яза, ярыша-ярыша хикәяләр, поэмалар иҗат итә.
Берләшмә әгъзаларының күбесе шәһәр төзелешендә, химия комбинаты цехларында эшләүче гап-гади хезмәт кешеләре булган. Матур-матур шигырьләр язучы Мизхәт Хәбибуллин, Мөхәммәт Шәйхи – тимерләрне эретеп ябыштыручылар; Фәннүр Сафин һәм Рифкат Имаев – «Нефтехим»да слесарь, аппаратчы; очерк һәм хикәяләр остасы Мөслах Таҗи һәм Фәтхулла Абдуллиннар төзелештә прораб булып эшләгәннәр. Кыскасы, әдәби берләшмә әгъзалары язылачак әсәрләре, булачак геройлары арасында кайнап йөргәннәр. Ә журналистлар Рахмай Хисмәтуллин, Айдар Хәлим, Минвәгыйзь Зәйнетдиновлар турында әйткән дә юк... Шуның нәтиҗәсе буларак, Айдар Хәлимнең «Беренчеләр» һәм «Биктырыш», Рахмай Хисмәтуллинның «Үземне таптым», Фәтхулла Абдуллинның «Көмеш тәңкәле нигез» дип аталган, шәһәрнең елъязмасын тәшкил итүче китаплары дөнья күргән. Аларны шәһәр тарихын яктыртучы беренче карлыгачлар дип әйтергә була.
Ул чорда берләшмә утырышларына җырчылар, музыкантлар, рәссамнар да йөргән. Берсе – нефть химиясе өлкәсендә булачак галим Азат Зыятдинов, икенчесе – режиссер Наил Нуретдинов, өченчесе – инженер-конструктор Нил Садыйков; киләчәктә лауреат һәм халык рәссамы исемнәрен алачак Әхсән Фәтхетдинов кебек егетләр дә берләшмә әгъзалары белән бер казанда кайнаган.
Әдәби берләшмә әгъзалары, төп эшләреннән тыш, иҗат белән генә шөгыльләнсәләр дә рәхмәттән башка сүз әйтеп булмас иде. Алар ай саен клубларда әдәби-музыкаль кичәләр үткәргәннәр; мәктәпләрдә укучы балалар белән очрашканнар; шәһәребездәге бердәнбер татар мәктәбен саклап калу өчен имза җыйганнар; «Ни өчен «Союзпечать» киоскларында татарча газета-журналлар юк?» – дип, рейдлар уздырганнар. «Тарихын белмәгәннең – киләчәге юк», дип, ел саен изге Болгарга сәяхәт оештырганнар.
«Ләззәт» һәм «Илһам» ансамбльләре белән һәрчак иҗади дуслыкта яшәгәннәр. Алар әдәби очрашуларның бизәге булып торган. Әлеге элемтәләр тора-бара иҗади хезмәттәшлеккә әверелгән. Ансамбль җитәкчеләре Флүр Гайнемөхәммәтов, Илһам Хисмәтуллин һәм музыкант Азат Нәҗмиевләр күп кенә шагыйрьләребезнең шигырьләренә көйләр язган, һәм бу күркәм гадәт бүген дә дәвам итә.
Китапханә хезмәткәрләре басылып чыккан китапларыбызны һәм, гомумән, татар әдәбиятын пропагандалауда күп көч куя. Алар әледән-әле язучылар белән очрашулар оештыра, яңа чыккан китапларга презентация үткәрә.
Без шәһәребезнең мәдәният һәм мәгариф идарәсе белән берлектә ел саен Г.Тукай һәйкәле янында шигырь бәйрәме үткәрәбез. Анда татарлар гына түгел, шәһәребездә гомер итүче руслар, украиннар, башкортлар, таҗиклар, әзәриләр һәм башка милләт вәкилләре дә катнаша. Алар да, татарлар белән бергә, ел саен Тукайга кочак-кочак чәчәкләр китерә.
«Кама таңнары» әдәби берләшмәсенә 50 ел дидек. Шушы чор эчендә берләшмәдә 200дән артык иҗат кешесе каләм тибрәткән, 150ләп китап нәшер ителгән, «Чулман акчарлаклары», «Туган як әдәбияты”» исемле күмәк җыентыклар, «Кама таңнары» альманахының 1 – 4 нче саннары дөнья күргән.
Үткән 50 ел эчендә «Кама таңнары» әдәби берләшмәсенең уңдырышлы туфрагыннан Разил Вәлиев, Рахмай Хисмәтуллин, Айдар Хәлим, Фәннур Сафин, Әхмәт Гадел, Зөлфәт Хәким, Мизхәт Хәбибуллин, Хатыйп Касыймов, Таһир Нәбиуллин, Фәнзаман Баттал, Җәмилә Әхтәмова, Мөхәммәт Шәйхи, Фәтхулла Абдуллин, Илдар Хәйруллин, Марс Хафизов, Рифкат Имаев, Алмаз Хәмзин, Хөсәен Җәгъфәр, Илзирә Вәлиуллина кебек күренекле һәм үзенчәлекле язучылар, шагыйрьләр үсеп чыкты. Журналистлар тагын да күбрәк.
Шунысы куандыра: төбәгебездә өлкәнрәк язучы абый-апалары үкчәсенә басып килүче өметле яшьләр, иҗаты игътибарга лаек балалар шактый күп. Районыбызда нәшер ителүче «Туган як» газетасы ай саен, укучы балалар иҗатына багышлап, махсус «Балалар почмагы» дигән әдәби сәхифә биреп бара. Бу факт үзе генә дә киләчәгебезнең өметле икәнен күрсәтеп тора.

 

 

Бүген Татарстан Язучылар берлегенең Балалар әдәбияты остаханәсендә яшь язучы Гөлшат Имамиева иҗатын тикшерделәр.

Бүген Сарманның сәнгать мәктәбендә Аяз Гыйләҗевның тууына 90 ел тулуга багышланган очрашу булды.Очрашуны Сарман «Үзәкләштерелгән китапханә» хезмәткәрләре оештырды. Әдәби чарада Аяз аганың хатыны Нәкыя Гыйләҗева, улы- драматург Мансур Гыйләҗев, Татарстан Язучылар берлеге рәисе Данил Салихов, Татарстанның халык язучысы Гәрәй Рәхим, Татарстанның халык шагыйре Роберт Миңнуллин, КФУның татар әдәбияты кафедрасы доценты Миләүшә Хәбетдинова катнашты. Сәнгать мәктәбе укучылары Аяз Гыйләҗев әсәрләреннән торган зур программа әзерләгәннәр иде. Казаннан килгән кунаклар язучы хакында хатирәләре белән уртаклаштылар.

Пәнҗешәмбе, 13 Декабрь 2018 15:36

Татарстанда театр елын ачтылар

Бүген Габдулла Тукай исемендәге Әтнә Татар дәүләт драма театрында Театр елын ачу тантанасы  узды. Театр елын Татарстанда Президент Рөстәм Миңнеханов ачты.

Бәйрәм тантанасында Татарстан Язучылар берлеге әгъзасы, язучы, татар әдәбияты галиме, профессор Фоат Галимуллин катнашты.

 

Страница 4 из 128
Союз писателей РТ