Админ

Шимбә, 11 Август 2018 08:47

Бәчектә әдәби бәйрәм була

Бүген Татарстанның Яшел Үзән районы Бәчек авылында әдәби очрашу уза. Бу авылда Габдулла Тукайның Саҗидә апасы яшәгән. Бәчек аның истәлеген кадерләп саклый. Авылда әдәби, мәдәни чаралар, күренекле каләм ияләре белән очрашулар инде традициягә әйләнгән. Бүгенге чарада Татарстан Язучылар берлеге рәисе Данил Салихов, Г.Тукай премиясе лауреатлары Гәрәй Рәхим һәм Ркаил Зәйдулла; Рифат Җамал катнаша. Бәйрәм 13 сәгатьтә башлана.

Шимбә, 04 Август 2018 08:23

Юбилей котлы булсын!

Бүген Татарстанның халык шагыйре Равил Фәйзуллинның туган көне. Мөхтәрәм каләм иясенә -75 яшь! Юбилярыбызга саулык, байлык, иҗади тынгысызлык телибез!

Сишәмбе, 31 Июль 2018 09:42

Флера Тарханова вафат...

Кайгылы хәбәр... Каты авырудан соң шагыйрә Флера Тарханова вафат булды. Мәрхүмә белән хушлашу иртәгә -1 августа 10 сәгатьтә Г. Тукай исемендәге Татар дәүләт филармониясендә була. Шагыйрә туган ягында - Чистай районы Яуширмә авылында җирләнәчәк. Мәрхүмәнең туганнарының тирән кайгысын уртаклашабыз...

Хөрмәтле дуслар!

Бүген Арча районының Өчиле авылында, "Ахун чишмәсе" янындагы буада "Фәйзуллин йөзүләре" узачак. Татарстанның халык шагыйре Равил Фәйзуллин башлап җибәргән, инде традициягә әверелгән, быел кырыгынчы тапкыр узучы спорт һәм әдәбият бәйрәмендә язучылар, сәнгать әһелләре, журналистлар катнаша. Оештыручылар -Арча районы хакимияте һәм Татарстан Язучылар берлеге. 

Башлана - 12 сәгатьтә.

Бәйрәмгә рәхим итегез!

Җомга, 27 Июль 2018 09:55

Кайгылы хәбәр

Драматург, Татарстан Язучылар берлеге әгъзасы Гафур Каюмов вафат.

Мәрхүм белән хушлашу бүген 13 сәгатьтә язучының туган авылы - Арча районы Яңа Сәрдәдә була.

Туганнарының, якыннарының тирән кайгысын уртаклашабыз... Мәрхүмнең урыны җәннәттә булсын...

Пәнҗешәмбе, 12 Июль 2018 10:50

Юбилей котлы булсын!

Язучы, галим һәм күренекле җәмәгать эшлеклесе, техник фәннәр докторы, 1994 елдан Татарстан Язучылар берлеге әгъзасы, Һади Атласи исемендәге бүләк иясе Зәки  Зәйнуллинга 85 яшь тулды.  Күренекле каләм иясен чын күңелдән тәбрик итәбез! Саулык, җан тынычлыгы, озын гомер телибез!

 

Гаилә – һәрбер җәмгыятьнең иң кечкенә  өлеше булса да, иң ныклы  нигезе. Аның һәрберсе үзе бер дәүләт. Чөнки анда киләчәк кешесе үсә һәм тәрбияләнә. Яшерен-батырын түгел  беркүпме вакыт гаиләнең әһәзмияте  түбәнсетеп  күрсәтелде. Бу  шактый гына зыян да салды. Ләкин менә унберенче тапкыр  инде, 2008 елдан башлап илебездә 8 июльдә Гаилә, Мәхәббәт һәм Тугрылык көне билгеләп үтелә. Аны уздыру елдан ел  зуррак колач алып  зур бәйрәмгә әйләнә.  Бу көнне 25 елдан артык  бер-берсен яратып, хөрмәт  итеп яшәгән,  шәһәребез тормышында зур роль уйнаган парларга  «Мәхәббәт һәм тугрылык өчен» медале тапшырыла.

 Алдагы елларда Татарстан Язучылар берлеге тәкъдиме белән бу  медаль белән  язучы Нәбирә Гыйматдинова һәм язучы Галимҗан Гыльманов гаиләләре бүләкләнгән иде. (БүләкРоссия Федерациясенеке, Мәскәүдән расланып кайта).  Быел  бу  медальгә,  Идарә карары белән, каләмдәдшебез, балалар шагыйрәсе, Абдулла Алиш премиясе лауреаты  Йолдыз Шәрапова гаиләсе лаек дип табылды. Биш бала үстерүләренә карамастан, җәмәгать эшләрендә дә актив катнашырга вакыт табалар. Тәрбиягә бала алган гаиләләрнең «Без бергә» республика оешмасының  да  актив әгъзалары.  «Гаилә сүзе русча «7 мин»  дип тәрҗемә ителә. Һәр гаиләдә 7 мин булырга тиеш!» – ди  Йолдыз ханым Шәрапова.

 

Халык шагыйре Лена Шагыйрьҗан: “Бу дөньяга килеп, шагыйрь дә булмасаң, ни үкенеч... Һәр авылның үз шагыйре булса да артык түгел. Һәр урамның, һәрбер йортның үз шагыйре булсын иде”, – дип язган. Һәр урамның, һәрбер йортныкы ук булмаса да, авылларыбызның, шөкер,  һәрберсенеке диярлек язучы-шагыйрьләре бар. Халкыбызда тагын әле “Шагыйрьле авыл – бәхетле авыл” дигән гыйбарә дә яши. Димәк, Тукай районының Күзкәй дигән җырлап торган исемле авылы да бәхетле авыллар рәтендә. Чөнки бу авылда 1948 елның 27 июнендә шагыйрь Фәннүр Сафин дөньяга килгән. Дөрес, ул чакта Күзкәй авылы Минзәлә районыныкы булган. Район исемендәмени хикмәт. Хикмәт – бүген дә күзкәйлеләрнең талантлы авылдашлары Фәннүр Сафинны онытмауларында, каләм иясе турындагы истәлекләрне кадерләп саклауларында.

Быелгы ямьле июль аеның беренче җомгасында Күзкәй авылының мәдәният йортында шагыйрь, озак еллар халык күңеленнән чыкмаган бик күп моңлы җырлар авторы Фәннүр Сафинның тууына 70 ел тулуга багышланган “Җырымда юатырмын” дип исемләнгән әдәби-музыкаль кичә үтте. Хәтер-хатирә, чын шигърият, моң кичәсе булды ул.

Зал тутырып Күзкәй авылы халкы,  мәктәп укучылары, Тукай районы китапханәчеләре җыелган иде. Чаллыдан Татарстан Язучылар берлегенең Чаллы бүлеге җитәкчесе Факил Сафин, язучы-шагыйрьләр Рәшит Бәшәр, Зөләйха Минһаҗева, Айгөл Әхмәтгалиева, Сирень Якупова килде.

Кичәне зәвыклы милли кием кигән егет белән кыз: “Алда әйтеләчәк һәр сүзебезне, җырланачак җырларыбызны тумышы белән шагыйрь булган каләм иясе, кыска гына гомерендә югалмас шигъри үрнәкләр калдырып киткән Фәннүр Сафинның якты истәлегенә багышлыйбыз”, – дип ачып җибәргәннән соң, сәхнәгә Тукай муниципаль районы башкарма комитеты җитәкчесе урынбасары Рөстәм Закиров менде. “Бүген безнең районда бик зур вакыйга. Чиксез дулкынлану, горурлык хисләре белән, якташ  шагыйребез Фәннүр Сафинны искә алабыз. Рәхмәт килгәнегез өчен, шагыйрь рухын хөрмәтләвегез өчен, –диде ул. – Бүгенге очрашудан алган хис-тойгыларыгызны, түкми-чәчми,  биредә була алмаган дусларыгызга, балаларыгызга, оныкларыгызга җиткерүегезне сорыйм.  Рухи байлык тудыручыларыбызны онытырга хакыбыз юк!”  Күзкәй авыл җирлеге башлыгы Эдуард Гәрәев, җитәкче фикерен дәвам итеп: “Авылыбызның бер матур урамына Фәннүр Сафин исемен бирү турында уйлашабыз”, – дигәч, зал алкышларга күмелде.

Тирән лирик шагыйрь Фәннүр Сафин, каләмдәш Фәннүр Сафин турында сөйләр өчен сүз шагыйрь, прозаик, Гаяз Исхакый исемендәге  бүләк иясе Факил Сафинга бирелде. “Фәннүр каләмдшләрен аңлый, күтәрә, дәртләндерә белә иде, – дип башлады Факил Сафин үз чыгышын. Һәм, мисал итеп, кайчандыр Фәннүр Сафин күреп алып, ярдәм иткән шагыйрь Ямаш Игәнәйне  атады. Билгеле инде,  “аз сүзле, тыныч холыклы, күзләрендә бетмәс сагыш” булган шагыйрь турындагы башка истәлекләре белән дә уртаклашты, ихлас, халыкчан иҗатына югары бәя бирде, аңа багышлап язылган шигырен укыды. Ялкынланып: “Сыркыды Такташның, Пешлә Шәриф Камалның, Кармәт Хәсән Туфанның, Күзкәй Фәннүр Сафинның туган авыллары булып милләт тарихында калачаклар!” – диде ул.

Күренекле әдип Рәшит Бәшәр исә истәлекләрен ерак студент елларыннан ук башлады. Ул Фәннүр Сафин белән Казан дәүләт университеында бер чорда белем эстәгән, бер тулай торакта яшәгән. Аралашканнар, иҗат утында янганнар. Бәшәр дә, Фәннүр Сафинның сабакташлары, балачак дуслары да шагыйрь турында сөйләгәндә күбрәк “тыйнак, ихлас, аз сүзле, тәртипле, итагатьле, моңсу карашлы, юмарт” дигән эпитетларны кулландылар. 

Истәлек кичәсендә чыгыш ясаган һәркем шагыйрь иҗатының, аеруча аның үлмәс җырларының, күңелләрне айкап, йөрәккә барып җитәрдәй көч-кодрәткә ия булуын ассызыклады. Дәлил булып, мәдәният йортын гамьгә төреп, моңга күмеп, шигырьләр, җырлар яңгырап торды.

Кызганыч, “хушлашырга ашыкма” дип өзгәләнгән Фәннүр Сафин якты дөнья белән бик иртә хушлашкан. Ләкин  аның яшәүгә, туган җиргә, сөйгән ярга мәхәббәт белән сугарылган шигырьләре, җырлары халык йөрәгендә бүген дә яши. Димәк, талантлы иҗат мәңгелек диюләре хак.

 

 

Г. Абдуллина

Страница 7 из 118
Союз писателей РТ