Админ

Дүшәмбе, 12 Ноябрь 2018 14:52

Бүген!

Казан федераль университетында 12-14 ноябрьдә  «Аяз Гыйләҗев һәм аның дөнья, Россия мәдәниятендәге мирасы» һәм «Чыңгыз Айтматов иҗаты Көнчыгыш-Көнбатыш традицияләре контекстында» фәнни-практик конференцияләре уза.

 

 

Казанның күренекле татар язучысы Габдрахман Әпсәләмов исемен йөрткән урамында тагын бер матур ял урыны – «Ак чәчәкләр» бульвары ачылды. Ачылу тантанасында Татарстан язучылары да катнашты.

Яңа ял урынында бары да камил, уйлап ясалган.  Биредә уен зоналары да, иҗат зоналары да, тыныч кына ял итеп, укып утыру зоналары да бар.

Бульварны булдыручыларга – афәрин!

Җомга, 09 Ноябрь 2018 15:48

Котлыйбыз!

Татар шагыйрәсеТатарстан Язучылар берлеге әгъзасы Салисә Гәрәевага  80 яшь тулды! Чын күңелдән тәбрик итәбез. Иҗади уңышлар булсын!

 

2018 елның 8-21 октябрендә Казанның В.И.Ленин исемендәге Мәдәни үзәгендә һәм «Юность» Мәдәният сараенда Шамил Закиров исемендәге «Идел-йорт» XVII Төбәкара театр коллективлары фестиваль-конкурсының йомгаклау туры узды. Сайлап алу турында катнашу өчен зоналарда узган турларда иң күп бал җыйган 18 халык театры сайлап алынган иде.

XVIII фестиваль-конкурсның иң югары бүләге – Гран-прига Бөгелмә шәһәренең «Татар мәдәнияте үзеге» халык театры лаек булды. Театр конкурста Туфан Миңнуллин әсәре буенча куелган «Гөргөри кияүләре» (режиссер – Татарстанның атказанган мәдәният хезмәткәре Флюра Шәрипова)  спектакле белән катнашты.

2018 елның 10 декабрендә Г.Камал исемендәге Татар дәүләт Академия театрында XVIII Төбәкара театр коллективлары фестиваль-конкурсы лауреатларын һәм дипломантларын тәбрикләү тантанасы узачак һәм Гран-при иясе –  «Гөргөри кияүләре» спектакле уйналачак.

Жюри әгъзалары тарафыннан барлыгы 54 спектакль каралган. Халык театрлары тарафыннан әсәрләре иң күп куелган драматурглар – Т. Миңнуллин (8 спектакль) һәм Д. Салихов (6 спектакль). Конкурска шулай ук Р. Җиһаншина, М. Фәйзи, Ш. Хөсәенов, Ф. Борнаш, Х. Ибраһимов, Н. Нәҗми, Ш. Камал, Р.Хөсәенова, Г. Камал, Н. Осипов, Ф. Бүләков, Ф. Садриев, Р. Сәгъди, И.Юзиев, А. Гыйләҗев, Н.Гәетбай, Аманулла, Р.Мингалим, М.Шахмалов, Р.Батулла, Р.Зәйдулла, Г.Исхакый, Э.Ибраһимова әсәрләре буенча куелган спектакльләр тәкъдим ителгән.

31 нче октябрь – 2 нче ноябрь көннәрендә Татарстанның бер төркем мәгариф, гыйлем, әдәбият әһелләре Илсур Һадиуллин – мәгариф министры урынбасары (делегация җитәкчесе), Илнар Һидиятов – Казан мәгариф идарәсе башлыгы, профессорлар Дания Заһидуллина, Искәндәр Гыйләҗев, Хатыйп Миңнегулов һ.б. Финляндиядә өч көнлек сәфәрдә булып кайттылар. Мәгълүм ки, бу ил күп тармаклар буенча дөньяда алдынгы урыннарны били. Шведлар бу мәмләкәт халкының биш процентын гына тәшкил итсәләр дә, аларның теле Финляндиядә чын мәгънәсендә икенче дәүләт теле буларак кулланыла.

Татарстан кунаклары мәгариф министрлыгы, Хельсинки университеты җитәкчеләре белән очраштылар, Рәсәйнең Финляндиядәге илчесе тарафыннан кабул ителделәр, ил башкаласының истәлекле, тарихи урыннарын карадылар, милләттәшләребез җирләнгән каберстанга да зиярәт кылдылар. Лахти шәһәрендәге дөньякүләм атаклы ISKU корпорациясендә күпфункцияле мәктәптә булдылар.

 Финляндиядә инде XIX гасыр урталарыннан бирле милләттәшләребез гомер кичерә, телләрен, диннәрен, гореф-гадәтләрен саклап килә, гәҗит-журналлар, китаплар чыгара. Казан зыялылары алар белән дә очрашты. Хельсинкидагы «Ислам җәмгыяте» бинасында Ш. Мәрҗанинең тууына 200 ел тулу уңае белән конференция булды. Анда Татарстан вәкилләре һәм Финляндиядәге кардәшләребез бөек мәгърифәтче, татар тарихы, әдәбияты, мәгарифе хакында доклад-чыгышлар ясадылар.

Хатыйп Миңнегулов

 

Тарихыбыз киләчәккә барыр

 

Чаллы дәүләт педагогия университетының актлар залында филология фәннәре докторы, профессор, Татарстанның атказанган укытучысы, Рәсәй халык мәгарифе отличнигы, Татарстан Язучылар берлеге әгъзасы Әнвәр Мәгъдәнур улы Шәриповның «Литература народов Поволжья и Приуралья» («Идел-Урал халыклары әдәбияты») дигән китабын тәкъдим итү кичәсе булды.  Күптән түгел генә дөнья күргән бу искиткеч саллы хезмәтне бәяләргә, авторга рәхмәт, хөрмәт сүзләрен җиткерергә галимнәр, язучылар, шагыйрьләр, һәм, билгеле инде, студентлар килгән иде.

Әлеге чараны оештыручы һәм матур итеп алып баручы филология фәннәре кандидаты, университет мөгаллимәсе Дания Сибгатуллина-Нигъмәтҗанова беренче булып сүзне уку йортының проректоры, профессор Азат Мөхәммәтшинга бирде. Ул университет залына җыелган  кунакларны, студентларны кайнар сәламләде һәм Әнвәр Шәриповка галим буларак та, шәхес буларак та югары бәя бирде. «Китапның әле дәвамы – икенче томы да булачак. Анысын да кулга алып сөенергә язсын», – диде ул, чыгышын тәмамлап.  Аннан соң сүз алган университетның фәнни эшләр буенча проректоры Искәндәр Шакиров, Алабуга дәүләр педагогика университеты доценты Гомәр Даутов, китапның төп рецензентларының берсе, филология фәннәре докторы  Венера Макарова да – әлеге хезмәт тарихыбызны киләчәккә алып бару өчен, татар әдәбиятының үсеш юлын күрсәтү өчен, культуралар диалогына ихтыяҗ арткан заманда, культуралы кеше, шәхес тәрбияләү өчен кирәк дигән фикерне ассызыкладылар.

Татарстан Язучылар берлегенең Чаллы бүлеге җитәкчесе, филология фәннәре кандидаты Факил Сафин да тирән белемле галим, принципиаль кеше, лирик шагыйрь Әнвәр Шәрипов тарафыннан зур эш эшләнүен билгеләп үтте. «Бу басмага каләм ияләре турында шактый мәгълүмат тупланган. Китапта Чаллы язучылары да бар!» – диде ул, горурлануын яшермичә. Күренекле әдип Айдар Хәлим, Татарстанның атказанган мәдәният хезмәткәрләре Гөлзада Рзаева һәм Рубис Зарипов, шагыйрьләр Әлфия Ситдыйкова, Айрат Суфиянов, шагыйрь, «Мәйдан» журналының баш мөхәррире Фидаил Мәҗитовның да чыгышлары ихласлык, соклану һәм рәхмәт хисләре белән сугарылган иде.

Кичәгә ямь биреп, Әнвәр Шәриповның «Мин дөньяны үзем иҗат итәм», «Туган телем», «Казан өстендә азан» һәм башка күп кенә шигырьләре яңгырады. Студент кызлар исә Әнвәр Шәрипов сүзләренә Мәсгут Имашев иҗат иткән «Сабантуйлы Татарстан» җырын башкардылар. Алар:

Сөлгеләрне сөлгеләргә бәйләп,

Их, урарга иде Җир шарын!

Күрсен иде дөнья Сабантуйлы

Татарстан дигән ил барын! –

дип дәртле җыр сузганда, залда утыручы һәркемнең милләтем дип типкән йөрәге, чыннан да, Җир шары тирәли очып әйләнгәндәй булгандыр. Билгеле инде, киләчәккә өмет һәм чиксез ышаныч хисләре белән.

С. Якупова

 

 Роберт Миңнуллинның 70 яшьлек юбилее уңаеннан чаралар дәвам итә. Кичә шагыйрь Уфа шәһәрендә  яңа китапларын тәкъдим итте. Очрашу «Кызыл таң» татар газетасы редакциясендә узды, анда шагыйрьнең иҗатын яратучылар, хезмәттәшләре, артистлар, журналистлар катнашты.

Башкортстанның халык шагыйре К. Аралбай Роберт Миңнуллинга багышланган шигырен укыды. Язучыны Башкортстан Язучылар берлеге рәисе З.Алибаев, сатирик шагыйрь М.Сәлимов, Башкорт Академия драма театры актрисасы И.Газетдинова, профессор Р.Насыйбуллин,  ветеран журналист Р.Карамовлар котлады.

Татарстаннан килгән кунаклар – Г.Ибраһимов исемендәге Тел, әдәбият һәм сәнгать институты директоры, шагыйрьнең бертуган энесе К. Миңнуллин, әдәбиятчы галим Ә. Закирҗанов, филология фәннәре докторы Л. Минһаҗева чыгыш ясады.

Юбилей елында Р.Миңнуллинның «Мин сагынам сезне, авылдашлар!», «Депутат чаклар бар иде...», «Наҗар Нәҗминең сайланма әсәрләре», Хәсән Назар шигырьләренең татарчага тәрҗемә  китаплары дөнья күрде.

Бүген – 1 ноябрьдә Уфа «Нур» татар дәүләт  театрында Роберт Миңнуллинның  иҗат кичәсе узачак.

 

(«Башинформ» мәгълүматына нигезләнеп. Фото: bashinform.ru)

 

 

 

Язучы Айдар Хәлимнең «Татар солдаты» китабы «Александр Невский» Бөтенроссия тарихи-әдәби премиясе дипломанты булды.

Бу хакта Татарстан китап нәшриятына  әлеге премиянең оештыру комитетыннан хәбәр иттеләр.

Котлыйбыз!

 

Страница 8 из 128
Союз писателей РТ