Админ

         2018 елның 26 нчы мартында Буа районы Яңа Чәчкап урта мәктәбендә Гаяз Исхакый бүләге лауреаты, Татарстаның атказанган сәнгать эшлеклесе, атказанган мәдәният хезмәткәре Әхмәт Рәшит исемендәге III «Кояшлы ил» республикакүләм  фәнни-гамәли конференциясе узды. Конференциядә мәртәбәле кунаклар: язучы, Татарстанның атказанган мәдәният хезмәткәре, Фатих Хөсни исемендәге әдәби премия лауреаты Марат Әмирханов,  шагыйрь, Татарстанның атказанган сәнгать эшлеклесе, Абдулла Алиш исемендәге премия лауреаты, Татарстан китап нәшрияте мөхәррире  Галимҗан  Гыйлманов, шагыйрә, Татарстанның атказанган сәнгать эшлеклесе,  Абдулла Алиш исемендәге премия лауреаты Йолдыз Шәрәпова шагыйрь, Намык Кемаль  исемендәге әдәби премия лауреаты, Татарстан китап нәшриятының балалар һәм яшүсмерләр, махсус проектлар редакциясе мөхәррире Рифат Сәлах, Казан дәүләт аграр университетының терлекчелек кафедрасы мөдире, авыл хуҗалыгы фәннәре докторы, профессор, Татарстан Республикасының атказанган фән эшлеклесе Газимҗан Шәрәфетдинов, «Болгар» радиосы  журналисты Фаил  Гыймадов,  шагыйрә Гөлшат Мөхтәровалар катнашты.                                                                                 

           Конференция дүрт юнәлештә барды: «Утырып уйлар уйладым», «Җәннәт әниләр аяк астында», «Үзем сайлаган язмыш», «Толстой – Казанда». Үзләренең иҗади эшләрен йөздән артык бала яклады. Конференциядә Буа, Апас, Кайбыч, Кама Тамагы, Казан, Чистай, Актаныш районы укучылары катнашты. Балаларга  Татарстан Язучылар берлеге һәм Аграр университетның  дипломнары тапшырылды, бәйрәмнән беркем дә бүләксез китмәде.

Сишәмбе, 27 Март 2018 11:37

Кайгы уртаклашу...

Татарстан язучылары Кемеровода булган коточкыч фаҗигадә гомерләре өзелгән мәрхүмнәрнең туганнарының тирән кайгысын уртаклаша... Йортларына кайгы кергән һәркемгә Ходай күркәм сабырлыклар бирсен...



22 марттаТүбән Каманың Салих Сәйдәшев исемендәге музыка көллияте концертлар залында Татарстан язучылар берлеге әгъзасы, республиканың атказанган сәнгать эшлеклесе, язучы-прозаик, публицист, драматург Фәтхулла Абдулла улы Абдуллинның 80 яшьлек юбилее һәм иҗат юлына 50 ел тулуга багышланган ““Бу дөньяга без килгәнбез икән...” дип исемләнгән зур кичә үтте.Кичәдә мәртәбәле кунаклар – танылган шагыйрь, Татарстан Язучылар берлеге рәисе урынбасары Рәмис Аймәт, язучылар берлегенең Чаллы бүлеге җитәкчесе, шагыйрь, прозаик Факил Сафин, “Мәйдан” журналының баш мөхәррире Фидаил Мәҗитов, Татарстанның атказанган сәнгать эшлеклесе, язучы Фоат Садриев катнашты. Кичәне тамаша кылырга язучының туганнары, якыннары, каләмдәшләре, китапханәчеләр, мөгаллимнәр, мәктәп укучылары, гомумән, мөхтәрәм язучының шәхесе һәм иҗаты белән кызыксынучы әдәбият сөючеләр җыелган иде. 


Мөслим якларында туып-үсеп, мәктәп елларыннан ук кулына каләм алган һәм гомере буена каурый каләменә тугрылык саклаган Фәтхулла Абдулллин - халкыбызның әдәби мирасын тирән фәлсәфи мәгънәгә ия әсәрләре белән баеткан, иҗатында гомумкешелек кыйммәтләрен, милли-мәдәни тарихыбызны, рухи хәятыбызны яктыртып, әдәбият тарихына тиңе булмас рухи хәзинә бүләк иткән олпат язучы. Бүгенге көндә 14 китап авторы булган Фәтхулла ага – актив җәмәгать эшлеклесе, елъязмачы, озак еллар дәвамында Түбән Кама язучыларының “Кама таңнары” әдәби берләшмәсен җитәкләүче, Аксакаллар шурасы әгъзасы, 15 ел дәвамында “Җидегән чишмә” әдәби-музыкаль берләшмәсенең сценарийлар авторы, Түбән Кама төзелешендә төрле җитәкче урыннарда эшләп, шәһәр өчен күп кенә мөһим объектларны сафка бастыруда, шул исәптән, беренче трамвайны линиягә чыгаруда катнашкан хезмәт алдынгысы да. 


Кичә барышында юбилярны гомер бәйрәме белән котлап, бик матур теләкләр, җылы тәбрикләү сүзләре әйтелде. Бөтендөнья татар конгрессының Түбән Кама бүлеге рәисе Рөстәм Ганиев, милли сәнгатебезне һәм әдәбиятыбызны үстерүгә зур өлеш кертүе өчен чиксез ихтирамын белдереп, юбилярга конгрессның рәхмәт хатын һәм чигүле түбәтәй тапшырды, шулай ук Министрлар Кабинетының тәбрикләү сүзләрен дә җиткерде. Аксакаллар шурасы рәисе Зирәк Шиһапов язучыны котлап, аңа “Шәрәфле аксакал” медален тапшырды. 


Татарстан Язучылар берлеге рәисе урынбасары Рәмис Аймәт Фәтхулла Абдуллинның татар әдәбиятын, мәдәниятен үстерүдә өлеше саллы булуын ассызыклап, әле әдәбият мәйданында Фәтхулла аганың “очланмаган кибәннәре” шактый булуын әйтеп узды, аңа истәлеккә Тукай энциклопедиясен бүләк итте. 


Якташлары – мөслимлеләр сәламен язучы Фоат Садриев һәм районның башка күренекле шәхесләре җиткерде, алар юбилярга Мөслим муниципаль районы башлыгы рәхмәт хатын һәм бүләкләр тапшырдылар, туган як сәламнәрен гармун, курай моңнары аша җиткерделәр. 
Ут күршеләребез – Татарстан язучылар берлегенең Чаллы бүлеге рәисе, “Көмеш кыңгырау” газетасы баш мөхәррире Факил Сафин Фәтхулла аганың әдәбият мәйданында яшь иҗатчылар тәрбияләүдә үзеннән зур өлеш кертүен билгеләп үтте, бу фикерне “Мәйдан” журналының баш мөхәррире Фидаил Мәҗитов та куәтләде, моннан тыш, Фидаил Васыйл улы Фәтхулла Абдуллинга, аның публицист һәм тарихи язмалар авторы да булуын исәпкә алып, эзләнү һәм яңа хезмәтләр язу өчен, архив документлары да тапшырды. 


“Кама таңнары” әдәби берләшмәсе вәкилләре остазлары Фәтхулла агага чиксез рәхмәтләрен җиткерделәр, ул җитәкләгән чорда берләшмә белән бәйле хатирәләрен яңарттылар, сәламәтлек, иҗади уңышлар теләделәр. 
Кичәдә Түбән Камадагы таҗик иҗтимагый оешмасы вәкилләре дә бар иде: алар Фәтхулла агага аерым, җылы мөнәсәбәттә, сикәлтәле гомер юлларын узган чакта Урта Азия якларын да буйларга насыйп булган Фәтхулла Абдуллин биредә дә тиз арада үзен көчле шәхес, тәҗрибәле оештыручы итеп таныта, җирле халык арасында абруй казана. 
Әлбәттә, юбилей кичәсендә язучының тормыш иптәше Альмира ханым, балалары, киленнәре, оныклары да катнашты. Алар да кадерле кешеләренә рәхмәт сүзләрен, ихтирам хисләрен белдерделәр, Фәтхулла аганың оныклары Алия белән Элина бабалары хөрмәтенә халкыбызның “Әпипә” биюен дә башкардылар. 
Алып баручылар – ТР атказанган мәдәният хезмәткәре Мингали Мөхәммәтшин һәм шәһәрнең Кол Гали исемендәге милли китапханәсе мөдире Гүзәлия Гыйбадуллиналарның искиткеч осталыгы, “Нардуган”ансамбле җырчылары һәм биючеләре, төбәгебезнең танылган җырчысы Илһам Хисмәтуллин башкаруындагы чыгышлар әлеге кичәгә аерым бер җылы, якты төсмер өстәде.

 

2018 елның 21 мартында Татарстанның халык язучысы Гәрәй Рәхим җитәкчелегендәге жюри бәйгегә йомгак ясады. Жюри  Татарстан Мәдәният министрлыгы, «Татмедиа» һәм Татарстанның Милли китапханәсе вәкилләре дкатнашында эшләде.

Ел китабын сайлауда Татарстанның 1510 китапханәсе катнашты. Конкурска 381 китап куелып, шуларның 51е –  татарча проза әсәре, 75е – татарча шигъри басмалар, 44 балалар китабы, 49 русча китап,  92 татарча публицистик һәм фәнни-популяр басма, 70 русча публицистик һәм фәнни-популяр басма.

Конкурс нәтиҗәләре буенча алты номинациядә җиңүчеләр билгенләнде.

 

«Татарча проза әсәре» номинациясе:

I урын – Нәбирә Гыйматдинова (Бикчурова) «Сөйлим, тыңла...»;

II урын – Айгөл Әхмәтгалиева (Муллагалиева) «Таллыкүлдә былбыл бар»;

III урын – Сәйдә Зыятдинова «Яралы кош авазы».

 

Кызыксындыру дипломнары:

 

Камил Кәримов «Игезәкләр йолдызлыгы»;

Гөлсинә Галимуллина «Алтын ачкыч»;

Равилә Шәйдуллина-Морат «Ялантауга ай кунган».

 

«Татар шигърияте» номинациясе:

 

I урын – Муса Җәлил «Моабит дәфтәрләре»;

II урын – Роберт Миңнуллин «Монда без дә бар әле!»;

III урын – Клара Булатова «Гасыр белән гасыр арасында».

 

 Кызыксындыру дипломнары:

 

Рәмис Аймәт «Бозлы җилкәннәр»;

Рәдиф Гаташ «Ихласнамә».

 

«Татарча балалар китабы» номинациясе»:

 

I урын – Габдулла Тукай «Әтәч илә Энҗе бөртеге»;

II урын – Лиана Әмирханова «Китап яратучы малай»;

III урын – Йолдыз Шәрәпова «Аппак белән Шапшак».

 

Кызыксындыру дипломы:

 

Факил Сафин «Керпенең шәһәргә сәяхәте».

 

«Русча матур әдәбият»номинациясе:

 I урын – Габдрахман Әбсәләмов «Ак чәчәкләр – Белые цветы»;

II урын – Әхәт Мушинский «Черный индюк, красные штаны...=Кара күркә, кызыл ыштан...»;

III урын – Рафис Корбан «Куда уходит ночь?».

 

Кызыксындыру дипломнары:

 

Рөстәм Кутуй «Сердитый трамвай»;

Борис Вайнер «О дырках в зонтике и о других важных вещах».

 

«Татарча публицистик һәм фәнни-популяр басма»номинациясе:

I урын – Әзһәр Шакиров «Язмыш»;

II урын – Индус Таһиров «Без тарихта эзлебез»;

III урын – Алла Сальникова, Диләрә Галиуллина «Татар «Әлифба»сы үткәне һәм бүгенгесе»

 

Кызыксындыру дипломнары:

Альберт Гадел «Фокуслар энциклопедиясе»;

Әхәт Гаффар «Сайланма әсәрләр. 4Т.».

 

«Русча публицистик һәм фәнни-популяр басма» номинациясе.

 

I урын – Юныс Әхмәтҗянов «Татарские национальные блюда»;

II урын – Роман Почекаев «Чингизово право: правовое наследие Монгольской империи в тюркско-татарских ханствах и государствах Центральной Азии»;

III урын – Фәндәс Сафиуллин «За свободу и равноправие».

 

Кызыксындыру бүләге:

 

Нияз Халит «Стили и формы татарской архитектуры Казани 1920 гг.».

 

 

 

 

 

 

Дүшәмбе, 26 Март 2018 13:36

Котлыйбыз!

Бүген Татарстанның халык язучысы Рабит ага Батуллага 80 яшь тулды. Мөхтәрәм каләм иясен бәйрәме белән чын күңелдән тәбрик итәбез. Саулык, байлык, имин гомерләр телибез!

 

 

24 мартта Чаллы шәһәренең Муса Җәлил исемендәге үзәк китапханәсендә танылган  шагыйрә, Габдулла Тукай бүләге иясе Клара Булатова белән очрашу булды.

"Мин шагыйрә. Мин шигырьләр  язам,

Мин  орлыклар гына чәчә алам.

Җыючылар  булыр бүтәннәр" – 
 дип язган  шагыйрәнең иллеләп  китабына  тупланган  иҗаты тормышчан, тере, мул шытымлы, тоныкланмас булуын күрсәтте дә инде әлеге кичә. Зирәк фикерле, чая телле, гаҗәеп хәтерле Клара апа чичән шагыйрә дигән данын тагын бер кат раслады.   

            Кичәне Роза Хәмидуллина алып барды. Ул, шигырьләр белән үреп, Клара  Булатованың тормыш һәм иҗат  юлына күзәтү ясады. Чаллы дәүләт драма театры артисткасы Гөлфия Фәйзрахманова  укуында яңгыраган шигырьләр дә гаҗәеп халыкчанлыгы,  эчкерсезлеге белән күңелгә хуш килде.

Тәгәрәпләр  йөгереп үтә гомер,

Җир шарыдай, юл түгәрәк түгел.

Аның  иге-чиге  бер булыр...

            Чаллы язучылары исеменнән хөрмәтле кунакны Татарстан Язучылар берлегенең Чаллы бүлеге җитәкчесе Факил Сафин сәламләде. Ул Клара ханымга иҗади хезмәте өчен рәхмәт әйтте һәм, гомер бәйрәме белән котлап, чәчәк бәйләме бүләк итте.

"Аяк  йөрми, куллар язмый,

Тел әйләнә чак кына,

Русча әйтсәк, әле пока

Соображает баш кына" дип шаяртып алса да,  Клара апа  кичә барышында бик аз утырып торгандыр. "Әлмәт язучылар бүлеге җитәкчесе Нур Әхмәдиев "Кайда йөри Булатова, анда инде буза туа" дия иде” дип көлдереп алгач,  ул сүзне мөгаллим хезмәттәшләренә   тапшырды. (Кичә  барышында, дилбегәне шулай үз  кулына алып, берничә  тапкыр матур гына борылышлар кертеп  җибәрде шагыйрәбез. Бар да Клара апача иде.) Хезмәттәшләре  аның Кәшер урта мәктәбендә эшләгәндә, экспромт туган шигъри юллар белән  тәрбия бирү  мисалларын китерделәр. Ул шагыйрә генә  түгел, ә көчле педагог та иде дип сөйләделәр алар. "Язмыш шулай язган: мин укытучы гаиләсендә туган, мәктәптә яшәгән, мәктәптә үскән, мәктәптә әвәләнгән  икмәк инде",  – диде ярты гасыр гомерен мәгарифкә  багышлаган өлкән мөгаллим Клара Гариф кызы үзе дә.  

Мөгаллим-шагыйрә Рәзинә Мөхияр шагыйрәнең иҗатына соклануын  белдереп, үзен белгәнче үк җырлары белән таныш булуын әйтте һәм "Зәңгәр  чәчәк" җырын җырлап  үтте. Татарстанның  атказанган  укытучысы, филология фәннәре докторы, шагыйрь Әнвәр Шәрипов исә: "Без бүген тарихи кичәдә утырабыз, чөнки Клара Булатова ул – легендар шәхес. "Йөрәкне  бәйлисе бар" дигән китапта аның образы бар, Хәсән Туфанның  атаклы Тәнәкәсе ул. Әлмәт районы Колшәрип авылында Клара Булатова исемендәге чишмә бар. Без бер чорда укыдык һәм арабызда Клара Булатова кебек шагыйрь барлыгын ул чагында ук белеп, горурланып укый идек", – дип, шагыйрәгә  хөрмәтен белдерде. Клара ханымның соравы буенча, Әнвәр әфәнденең  хәләл  җефете Фәйрүзә ханым аның "Сиңа кайтам"  шигырен  яттан  укыды. "Яттан уку  ул – акыл гимнастикасы", – ди  шагыйрә. Үзе бөтен шигырьләрен диярлек яттан белә.

            Шагыйрәне  таныткан тагын бер өлкә бар. Ул – җыр. Клара Булатованың бик күп сүзләренә көй язылган. "Шушы яктан, шушы туфрактан без", "Кыңгырау чәчәге", "Якын дустың  барын онытма"  һәм башка җырлары халык күңелендә урын алган. 76 җырын берләштергән җыентыгы дөнья күрү дә зур иҗатның бер дәлиле булып тора. Кичәгә килгән җырчы Илсөяр Зарипова башкаруында яңгыраган җырлар да тамашачы тарафыннан бик җылы кабул ителде. Татарстанның атказанган  мәдәният  хезмәткәре Рубис ага Зарипов "Сөю җыры" ның туу тарихы, 90 нчы еллардан  башланып киткән иҗади дуслык турында сөйләп үтте. Гармунчы Рәшит Мәүләвиев  белән бергәләп  җанга якын, тансык җырлар да башкарылды.

            Шагыйрәнең иҗаты  турында җылы сүзләр әйтүчеләр  күп булды. Төбәкне өйрәнүче галим-шагыйрь Мансур Сафин, Алабугадан  килгән  дусты, шагыйрә Кадрия Наил һәм башка каләмдәшләре аның сәламәт булып, озак еллар үз укучысын сөендереп иҗат итүен теләделәр. Әлбәттә,  бирегә җыелучыларның  барысы да  шул теләктә булгандыр. Клара апа кебек җор телле, зирәк акыллы шагыйрәнең рухи мирасы тагын да тулылану – милләт өчен зур  бәхет ул. Шагыйрә исә үзе, язмышыма рәхмәтлемен, дип белдерде һәм сүзен:

Бәхетлеме син, дигәнгә

Мин әле җавап бирмим.

Мин әле ул бәхетемнең

Үсүен көтеп йөрим, – дип тәмамлады һәм шатлыгы белән уртаклашты: дәвамчысы булган сигез яшьлек  оныгы  Гайшә Булатованың  китабы чыккан  икән. Афәрин!

           

            Лилия Фәттахова

           

           

 

 

 

 

 

22 март көнне, Халыкара шигърият көне уңаеннан, Яр Чаллы шәһәр үзәк китапханәсендә М. Җәлил, Һ. Такташ исемендәге премияләр лауреаты, төрки халыклар поэзиясе фестиваленең Х. Байкара исемендәге әдәби бүләк иясе, танылган шагыйрь, «Шомырт салкыннары», «Айның аръягында», «Бозлы җилкәннәр», «Тоткындагы ирек» һәм башка татар, рус, төрек, әзербәйҗан телләрендә дөнья күргән шигырь җыентыклары авторы, Татарстан язучылар рәисе урынбасары Рәмис Аймәтнең иҗатына багышланган әдәби-музыкаль кичә үткәрелде.

Чара Чаллы шәһәренең Татар драма театры артистлары чыгышы белән башланып китте. Алар бар тамашачыларның күңеленә үтеп керерлек итеп шагыйрьнең лирик шигырьләреннән тезмә укыдылар.
Рәмис Аймәт очрашу барышында үзенең тормышы, иҗатка килү юлы хакында аерым бер җылылык белән бәян итте. Шул рәвешле ул китап сөючеләрне үз дулкынына көйләп, аның укуында яңгыраган шигырьләр дөньясына сихерләп алып кереп китә алды. Шагыйрьгә адресланган сораулар да шактый булды. Р. Аймәт һәркайсына үз итеп, яратып җавап бирде. Табигый рәвештә җанлы, җылы әңгәмә килеп чыкты.
Кичәгә тагын бер җылылык һәм ямь өстәп, композитор-башкаручы Зөлфия Җиһан Р. Аймәт сүзләренә язылган җырларын бүләк итте.
Кичәдә шагыйрьнең каләмдәш дуслары да катнашты. Чаллы язучылар берлеге рәисе Факил Сафин, язучылар Рәшит Бәшәр, Әлфия Ситдыйкова, Айрат Суфиянов, Рәзинә Мөхияр һәм башкалар авторга җылы сүзләрен, изге теләкләрен җиткерделәр.
Аралашу барышында шигърият сөючеләр үзләре өчен яңа дөнья ачтылар, Рәмис Аймәт иҗаты белән инде таныш булганнар да күп яңалык һәм өр-яңа хисләр алып китте очрашудан.
Кичә азагында Рәмис Аймәт ихлас рәхмәтен белдереп үз шигырҗләренә иҗат ителгән популяр  җырларын башкарды. Әлеге очрашу килгән кунаклар күңелендә якты хатирәләр калдырды.

 

 

 Әлмәт шәһәренең 2нче номерлы мәктәбендә бик матур чара узды: балалар белән очрашуга Татарстан Язучылар берлеге әгъзасы, Р.Төхфәтуллин һәм С.Сөләйманова премияләре лауреаты, язучы һәм шагыйрь Әхәт Хәбибуллин килде. Балалар Әхәт Хәбибуллинның Антарктидага баруы,диңгезче булуы турында истәлекәрен, әсәрләрен кызыксынып тыңладылар, язучы белән фотога төштеләр. Әлеге чара җылы хәтирә булып хәтердә озак сакланачак.

Лилия Фәрхетдинова.

Страница 10 из 111
Союз писателей РТ